ಆಮ್ಚೊ೦ ಫಿರ್ಗಜ್ ಪಾತ್ರೊನ್ ಸಾಂತ್ ಅಂತೊನ್

ಆಜಾಪಾಂಚ್ಯಾ  ಸಾಂತ್ ಅಂತೊನಿಕ್ ನೊವೆನಾಚಿಂ ಮಾಗ್ಣಿ೦

ಯೆ ತರ್ ಜಾಯ್ಗಿ ತುಕಾ ಆಜಾಪಾಂ?

ಆಬ್ಳೆ ಮರಣ್ ಚೂಕ್ ಆನ್ವಾರಾಂ

ದೆಂವ್ಚಾರ್ ತಾಚ್ಯಾ

 ನಾಂವಾನ್ ಫೊಳ್ತಾತ್

ಕೊಡ್ಯೆ,ಪಿಡೆಸ್ತ್ ಬರೆ ಜಾತಾತ್.

ದರ್ಯಾಂಕ್,ಸಾಂಕ್ಳಿಂಕ್,

ತುಂ ಫರ್ಮಾಯ್ತಾ,

ಆಂದ್ಳ್ಯಾಂಕ್,ಪಂಗ್ಳ್ಯಾಂಕ್,

ಭೆರ್ಯಾಂಕ್ ಪಾವ್ತಾ,

ಕಿತೆಂಯ್ ಸಾಂಡ್ಲ್ಯಾರ್ ದಾಕೊವ್ನ್ ದಿತಾ,

ಲ್ಹಾನಾಂ ವ್ಹಡಾಂಕ್ ಭುಜೊವ್ನ್ ಧಾಡ್ತಾ.

ಮಾಗ್ಯಾಂ:

ಏ ಭೋವ್ ಭಾಗೆವಂತ್ ಸಾಂತ್ ಅಂತೊನಿ, ಭೋವ್ ಸಾಧ್ಯಾ ಆನಿ ಮಯ್ಪಾಸಿ ಭಕ್ತಾ, ತುಜಿ ಉತ್ತಮ್ ಶೆಗುಣಿ ಜಿಣಿ, ದೆವಾ ಥಂಯ್ ತುಜೊ ಜಳ್ತೊ ಮೋಗ್, ತುಜ್ಯಾ ಪೆಲ್ಯಾಂಚೊ ವರ್ತೊ ಮೋಗ್, ಸಂಸಾರಾಂತ್ ತುಂ ಆಸ್ತಾನಾಂಚ್ ವರ್ತೀ ಅಜಾಪಾಂಚಿ ಪದ್ವಿ ತುಕಾ ಫಾವೊ ಕರ್ತಾ. ತುಜ್ಯಾ ಉತ್ರಾಂಕ್ ವಿಜ್ಮಿತ್ ಅಜಾಪಾಂ ರಾಕೊನ್ ಆಸ್ಲ್ಲಿಂ ಆನಿಂ ಗರ್ಜಾಂ ಆಕಾಂತಾಂತ್ ಆಸ್ಲ್ಯಾಂ ಪಾಸತ್, ತುಜಿ ಪದ್ವಿ ಚಲಂವ್ಕ್ ತುಂ ಸದಾಂಚ್ ತಯಾರ್ ಆಸ್ ಲ್ಲೊಯ್. 

ಆಪ್ಲ್ಯಾ ಗರ್ಜಾಂತ್ ತುಕಾ ಉಲೊ ಮಾರ್ ಲ್ಲ್ಯಾಂಕ್ ಕೊಣಾಂಕ್ ಚ್ ತುಜಿ ಸಸಾಯ್ ಆನಿ ಭುಜಾವಣ್ ತುವೆಂ ಇನ್ಕಾರ ಕರುಂಕ್ ನಾಂಯ್. ತುಜ್ಯಾ ಬಳ್ವಾಂತ್ ಶೆಕಾಯೆಚೆರ್ ಪಾತ್ಯೆವ್ನ್, ತುಜ್ಯೆ ಮುಕಾರ್ ಖಾಲ್ತೆಪಣಾನ್ ಸರ್ಪಡೊನ್ ಹಾಂವ್ ಮಾಗ್ತಾಂ.

 ಸಾಂತ್ ಅಂತೊನಿ ಕಡೆ ಮಾಗ್ಣೆಂ

  ಏ ನಿಸ್ಕಳ್ಪಣಾಚ್ಯಾ ಧೊವ್ಯಾ ಫುಲಾ, ದುರ್ಬಳ್ಕಾಯೆಚೆ ಊಂಚ್ ದೆಕಿ , ಖಾಲ್ತೆಪಣಾಚ್ಯಾ ನೀಜ್ ಆರ್ಸ್ಯಾ, ಭಾಗೆವಂತ್ಪಣಾಚ್ಯಾ ಪರ್ಜಳಿತ್ ನೆಕೆತ್ರಾ, ಏ ಆನಂಧ್ಭರಿತ್ ಸಾಂತ್ ಅಂತೊನಿ, ದೇವ್ ಪುತಾಕ್ ತುಜ್ಯಾ ಹಾತಾಂತ್ ಘೆಂವ್ಚೊ ಸ್ವಾಧಿಕ್ ಉಪ್ಕಾರ್ ತುಕಾ ಫಾವೊ ಜಾಲೊ, ತುಜೆ ಕಡೆ ಪರಾತುನ್ ಮಾಗ್ತಾಂ:

  ತುಜ್ಯಾ ಪದ್ವೆದಾರ್ ಆಧಾರಾ ಖಾಲ್ ಮ್ಹಾಕಾ ಕಾಣ್ಗೆ. ದೆವಾನ್ ತುಕಾ ದಿಲ್ಲ್ಯಾ ಸಬಾರ್ ದೆಣ್ಯಾಂ ಪಯ್ಕಿಂ, ಆಚರ್ಯಾಂಚೆ ದೆಣೆಂ ವಿಶೇಸ್. ಮ್ಹಜೆರ್ ದಯಾ ದವರ್, ಆನಿ ಹೆ ಮ್ಹಜೆ ವ್ಹಡ್ ಗರ್ಜೆಂತ್ ಮ್ಹಾಕಾ ಪಾವ್...............

(ಥೊಡೊ ವೇಳ್ ಮೌನ್ ರಾವುನ್ ತೆಸಾಂವಾ ಖಾತಿರ್ ಮಾಗ್ಯಾಂ).

ಸಕ್ಕಡ್ ಆಕ್ರಮ್ ಮೋಗ್, ಮ್ಹಜ್ಯಾ ಕಾಳ್ಜಾಂತ್ಲೊ ಪಯ್ಸ್ ಕರ್. ಮ್ಹಜ್ಯಾ ಪಾತ್ಕಾಂಚಿ ಖರಿ ದೂಖ್, ಅನಿ ದೆವಾಚೊ ಆನಿ ಮ್ಹಜ್ಯಾ ಪೆಲ್ಯಾಚೊ ವರ್ತೊ ಮೋಗ್ ಮ್ಹಾಕಾ ಜೊಡ್ನ್ ದಿ;  ಆನಿ ಅಶೆಂ ಹ್ಯೆ ಜಿಣ್ಯೆಂತ್ ವಿಶ್ವಾಸಾನ್ ಸೊಮ್ಯಾಚಿ ಚಾಕ್ರಿ ಹಾಂವೆ ಕರ್ನ್, ತುಜೆ ಸಾಂಗಾತಾ ಸಾಸ್ಣಾಚ್ಯಾ ಸಾಸ್ಣಾಕ್ ತಾಕಾ ಹೊಗಳ್ಸುಂಕ್, ತಾಕಾ ಭೊಗುಂಕ್ ಅನಿ ಆಶಿರ್ವಾದಿತ್ ಕರುಂಕ್ ಸರ್ಗಾ-ರಾಜಾಂತ್ ಮ್ಹಾಕಾ ಪಾವಯ್. ಆಮೆನ್.

ಕಷ್ಟಾಂ -ಆಕಾಂತಾಂ ಪಾಸುತ್ ಮಾಗ್ಣೆಂ

  ಏ ವರ್ತ್ಯಾ ಸಾಂತಾ, ಸಾಂತ್ ಆಂತೊನಿ, ತುಜ್ಯಾ ಮಾಗ್ಣ್ಯಾ ವರ್ವಿಂ, ಮೋರ್ನ್,  ಚೂಕ್, ಆನ್ವಾರಾಂ, ದೆಂವ್ಚಾರ್ ಆನಿ ಸರ್ವ್ ಥರಾಂಚಿ ವೊಸ್ಯಾಚಿ ಪಿಡಾ ಪಯ್ಸ್ ಸರ್ತಾ ಮ್ಹಣ್ ಉಗ್ಡಾಸ್ ಕರ್; ತುಜೆ ಮಾರಿಫಾತ್ ಪಿಡೆಸ್ತಾಂಕ್ ಭಲಾಯ್ಕಿ ಮೆಳ್ತಾ. ಉಚಾಂಬಳ್ ದರ್ಯೆ ಥಂಡ್ ಜಾತಾತ್, ಬಂದಿವಾನಾಂಚ್ಯೊ ಸಾಂಕ್ಲಿ ತುಟೊನ್ ಪಡ್ತಾತ್, ಥೊಂಟೆ ಉಟೊನ್ ಚಲ್ತಾತ್, ಕುರ್ಡೆ ಪಳೆಯ್ತಾತ್, ಕೆಪ್ಪೆ ಆಯ್ಕಾತಾತ್, ಮೊನೆ ಉಲಯ್ತಾತ್, ಭಾಯ್ರ್ ಪಡ್ ಲ್ಲ್ಯೊ ವಸ್ತು ಮೆಳ್ತಾತ್. ಲ್ಹಾನ್ -ವ್ಹಡ್ ತುಜೆ ಕಡೆ ಮಾಗ್ತಾತ್ ಆನಿ ಮಾಗ್ ಲ್ಲೆಂ ಸರ್ವ್ ತಾಂಕಾ ಮೆಳ್ತಾ.

  ತುಜೆ ವರ್ವಿಂ ಆಪಾಯ್ -ಗ್ರಾಚಾರ್ ನಪಂಯ್ಚ್ ಜಾತಾತ್ ಆನಿ ಆಮ್ಚ್ಯಾ ಸರ್ವ್ ಗರ್ಜಾಂಕ್ ತುಂ ಪಾವ್ತಾಯ್; ಸರ್ವ್ ಪಾತ್ಯೆಣಿ ತುಜೆರ್ ದವರ್ನ್, ತುಜಿ ಕುಮಕ್ ಆಮಿ ಮಾಗ್ತಾಂವ್. ಇತ್ಲ್ಯಾ ವ್ಹಡ್ ಆಶೆನ್ ಆಮಿ ಮಾಗ್ತಾಂವ್ ತೆಂ ಸರ್ವ್ ಆಮ್ಕಾಂ ಜೋಡ್ನ್ ದೀವ್ನ್ ತುಜಿ ಪದ್ವಿ ಸಂಸಾರಾಕ್

ದಾಕಯ್.

  ಮ್ಹಜ್ಯಾ ಮಾಗ್ಣ್ಯಾಕ್ ಅಜಾಪಾಂಚೆ ಗರ್ಜ್ ಆಸೊಂಕ್ ಪುರೊ. ಪೂಣ್ ತುಂ ಆಚಾರ್ಯಾಂಚೊ ಭಕ್ತ್ ಜಾವ್ನ್ ಆಸ್ತಾಂ, ತುಕಾ ಮ್ಹಜೆ ಮಾಗ್ಣೆಂ ಆಯ್ಕೊಂಕ್ ಕಸಲಿಚ್ ಅಡ್ಕಾಳ್ ನಾ. 

ಏ ಮನ್ಶಾಕುಳಾಚಾ ಬಿರ್ಮತಿನ್ ಭರ್ ಲ್ಲ್ಯಾ ದಯಾಳ್ ಸಾಂತಾ, ತುಜ್ಯಾ ಹಾತಾಂತ್ ಖೆಳೊಂಕ್ ದಯಾ ಕೆಲ್ಲ್ಯಾ ಜೆಜು ಬಾಳ್ಕಾಕ್, ತುವೆಂ ಭುರ್ಗ್ಯಾ ಸಾರ್ಕ್ಯಾ ಕಾಳ್ಜಾನ್ ಮೋಗ್ ಕೆಲ್ಲ್ಯೆ ತಾಚ್ಯೆ ಭಾಗೆವಂತ್ ಮಾಯೆ ಮರಿಯೆ ಮಾರಿಫಾತ್ ಮ್ಹಜೆಂ ಮಾಗ್ಣೆಂ ಕಳಯ್. ತುಜೆ ಕಡೆ ಹಾಂವ್ ಮಾಗ್ತಾಂ ತೆಂ ಸರ್ವ್ ಜೆಜು, ಮರಿ, ಮ್ಹಾಕಾ ದಿತೆಲಿಂ ಮ್ಹಣ್ ಹಾಂವ್ ಘಟ್ ಭರ್ವಸೊ ದವರ್ತಾಂ. ಆಮೆನ್.

ಆಮ್ಚ್ಯಾ ಬಾಪಾ...

ನಮಾನ್ ಮರಿಯೆ...

ಮಹಿಮಾ ಬಾಪಾಕ್...

ಸಾಂತ್ ಆಂತೊನಿ, ಆಮಾ ಪಾಸುನ್ ವಿನತಿ ಕರ್.

ಕ್ರಿಸ್ತಾಚ್ಯಾ ಭಾಸೊವ್ಣ್ಯಾಂಕ್ ಆಮಿ ಫಾವೊ ಜಾಂವ್ಚೆಂ ಖಾತಿರ್.